Blank spot
Storfjord rundt
Onsdag 10. Juli, 2002
Fjell og fjordar er det Vestlandet er kjend for. Det var på tide å sjå kvifor.
Vi byrja turen i Hellesylt, der rakk vi akkurat den timeslange fergeturen til Geiranger. Omringa av tyskarar, amerikanarar og polakkar kunne vi beundre fjella, fossane og fjellgardane, alt som Geirangerfjorden er kjend for.
I Geiranger tok vi ein liten tur til Norsk Fjordsenter, eit ganske nyopna senter for bevaring av fjordkultur. Her kunne eg friske opp gamle kunnskapar og tileigne meg nye om korleis livet rundt fjordane har vore. Så var det på tide med ein rast, medan regndropane såvidt fekk helst på oss.
Jordbær i Valldal
Så gjekk turen vidare opp Ørnevegen, over fjellet, til Eidsdal der ferga hadde byrja sleppe bilar av. Det vart altså eit kort besøk i Eidsdal før ferga førte oss over fjorden til Linge. Derfra køyrde vi til Valldal. Å kjøpe ei kasse med sommaren sine frukter er obligatorisk når ein køyrer gjennom jordbærbygda. Samstundes fekk vi helse på ein gamal kjenning, tubaist og dirigent i Valldal skulekorps, som overleverte ei kasse med søte gode jordbær.
Siste stopp før heimturen var Trollstigen, litt under ein times køyretur frå Valldal. Og etter eit kjapp fotosession blant dei stupbratte fjella og svingete vegane fekk vi oss noko å ete på før turen heim til Stranda.
