Onsdag 16. Juli, 2003
For nokre veker sidan var forfattaren av boka «Far lukter svidd», Craig Whitson, på TV. Der fortalde han sjølvsagt litt om grillboka si, men samstundes viste han nokre av triksa som han sikkert avslører i boka. Eg har diverre ikkje kjøpt ho, men både i går og i dag har vi testa ut det han så vidt viste på TV om direkte og indirekte grilling.
Kva er så direkte og indirekte grilling
? Det går kort og greitt ut på at ein deler grillen inn i soner, med og utan kol. Eg delte grillen i to og samla alt kolet i eine halvdelen av grillen. Grillen ein nyttar skal/bør/må ha lokk.
Først legg ein kjøtet på den varme delen, den med kol. Dermed får kjøtet raskt farge. Legg gjerne lokket på for å redusere oppflamming. Snu kjøtet etter ei lita stund for å få farge på andre sida. Dette er direkte grilling. Deretter, når kjøtet har fått den riktige fargen, flyttar ein kjøtet til den delen utan kol. Legg lokket på att og lat kjøtet godgjere seg i varmen. Etter nokre minutt er kjøtet klart. Dette er den indirekte grillinga.
Denne måten å grille på passar best til litt tjukke kjøtstykke. Vi har prøvd med tjukke grillbein og sommerkotelettar, men det beste resultatet fekk vi med ein feit nakkekotelett. Eg har aldri smakt ein så saftig nakkekotelett i mitt liv, og eg får sikkert ikkje til å gjere noko sånt med ei steikepanne. Nammenam!